2Cor 6 | GbrGAW | STEP | Ngye atnu-tnu kun zhin yi n She kwoyi yi gyi fye wye nu, alheri Shekwoyi nya nfye la gwo nyi fye to fa kwa ze banzan.

2 Corinthians 6

1 Ngye atnu-tnu kun zhin yi n She kwoyi yi gyi fye wye nu, alheri Shekwoyi nya nfye la gwo nyi fye to fa kwa ze banzan. 2 Fye wo ɓo n Shekwoyi da, “Mi ɓei wo fye bwichi, ntuge ma wu fye sun-sungye, Ma bma fye zhin ntuge ma gni fye.” Fye wo, Esa nyi n fye ɓa gwo Shekwoyi sun-sun-gye, Nnaiye zhin gni-gni nyipyeyi nu.

3 Yi to cei pma, zaho wa gye ge eyi tnu-tnu to bmiya lom, ntu cenu to yi ye, ya ɓe n wahalai n zaho-zahoi aba m. 4 Maimakon lo nu dna nyahonyahoi n ya zhin, yi wu ge yi zhin Shekwoyi abara nu, dna n hakuri bwa na wahala yi.

5 Esa mwa a kuyi lu, akuyi fi n kurkuku, avi ɓai wyiyi anya, tnu-tnu ku yi duwyi har ma nsahoi to yi mi n nyagyi m, balle a cige yi wangye. 6 Yi ku yihin tukwo wu ge, yi zhin Shekwoyi abara nu dna n yi zan-zan gyi-gyi-yi, n yeye gaiciya nya yi, n hakuri yi dna n Zafun Gyi-gyi-yi. 7 Dna yi ɓeda gaiciya nya, njesun dna Shekwoyi iko, yi zhin wo nya nu Ɓefyece nu zhin eyi agu okun nya, yi ba sunkun n kwoi nu, ya kna yihin.

8 Nsahoi a gayi mwa-mwa, sahoi kwa a ciyi wyegba; Nsahoi a kpeya gye, nsahoi a layi tu. Kwo shi kwo nyi yi da gaiciya, a zhin a gye yi ngye aza kata.

9 Aza kpeyi ye vinya ɓa wu ngye ɓa ta kpe yi ye m. Nsahoi kwa wu ngye yi ku fi, ama shi fya gye nyi, yi n wyewyeyi lo, aku yi lu, ama yi to fi m. 10 Yi bugba wun yi lo, ama yi n agmada yi lo ci-ci, yi wu lo n gye yi to n nyaho yim, ama yi ga azaje arziki lo, ko yi to arzikim, yi n nyaho-nyahoi lo vinya. 11 Omi anugundo a Korintiyi, yi ku ɓo da cewo n fye yi, yi la eya bugba guya vinya ga fye. 12 Yi to so eya bugba n fya ba m. Ofye nu ku ofya bugba so yi. 13 Mi daɓo n fyei ngye omi aɓi nu, fye wu yi ye-ye pya, n yi cei lo n fye ɓo nyi. Fye gu ofya bugba ya vinya.

Fye To Ye Ɓedom

14 Fye to laɓa ngye fye wu gmanyi gmanyi n natna-viyi. Gama kwo to bmiya lo lonu m. Ɓemanayi nɓenukwoyi ɓa gyi nugundo n wuna? Buzangna n wyegma yi ɓa mi ɓa gni zan-zan? 15 Kristi n Shetan yi ɓa ye na jeyi n wuna? Yesu-viyi n kni nu lo n wo ɓa gni zhin n tna-viyi a? 16 Shekwoyi puwa ɓa gyi nugundo nwuna n ashan puwa yi a? Gama yi nabari manayi n wa ɓe yi n cei nfye zhin Shekwoyi aduwa-nyakun nu, shi Shekwoyi ku da n wohin, “Ma zhin emi puwa n ma azayi nu, ma sa-se nɓa mi, ma ze ʼɓa Shekwoyi ɓa ze ʼmi aza.” 17 Ntucenu Shekwoyi ku da, “Dole fya fa ɓa, fye la gnaje n ɓai, Fye to zhin nyaho-nyahoi n nyayi n kwo to gyi-gyi-yi m. Mi ɓa gwo fye.” 18 Miɓa ze of ye da-da, Fye ɓa ku ze omi aɓi, Shekwoyi nu na da lo nu.